Actualités

© Christian Wyss-Chodat

E Reaktion

Nachere unnötige Niederlag am letschte Wuchenänd gege d Oltner Truppe, hämmer die vergangeni Wuche brucht um Kleinigkeite z korrigiere, vill als Team zämmezspiele und als Team wieder an eim Strick z zieh.

Syt neustem gits s Kläppergässli nid nur z Basel, sondern au in Gänf vor em Training. Die Wuche het öpper ganz oft duremiesse, weller offebar sini Uhr im „lac de Genève“ verlore het. Am Donnstig nachem Training isches allne klar gsi, dass mr am Wuchenänd punggte mien und das au definitiv mache wärde! Au wenn mr in de Ahzahl an Spieler dezimiert gsi sin, well die junge Talänt z Tenero sin, isches klar gsi, die Pünggt gönn nach Gänf!

Am Fritig Obe isches sogar überraschen allne klar gsi, wenn me sich am neggschte Morge trifft und niemerts het miesse Andere ahlütte. Alli hänn sich pünggtlig und motiviert am Bahnhof troffe. Die langi Reis (mr hänn sogar no e „pêcheur“ ufgablet) isch zum Glück schnäll verbigange und bald simmer scho ufem neue, blaue Trampolin z Luzärn ahkoo (spöter während em Spiel het wirkligg Situatione gää, wo emne Vergniegigspark glich ko sin).

S Spiel het Agfange und d „Grenat“ hänn dirägg voll losglegt. Vill Ballbsitz, Balleroberige und e subbere Uffbau het unser Spiel prägt. De Gegner het schnäll gmerkt, dasses fr ihn do nidesovill z hole git. Es isch nid all z lang gange bis de Ball vom Gaël s erschte Mol im Luzärner Goal versorgt worde isch. Nachere kurze Egge für Luzärn isches denn nacheme Foul uf de Goallinie (do gönn d Meinige usenander) zumne Penalty ko. D Luzärner hänn d Chance zum Usglich vergä. Nach däm isch uns klar gsi, dasses wieder an uns isch s Tempo im Spiel ahzgää und die neggschte Kreissituatione z kreiere. Das isch uns zum Glück au glunge und bald isch s zweite und s dritte Goal gfalle. So sinnmer glückligg und mit beschter Luune in d Kabine gange. Uns isch klar gsi, dass erscht d Hälfti vom Spiel verbi isch und s schnäll got, dass de Gegner wieder zruggkunnt und z Gfühl het, dasses öppis z hole git.

Natürligg nid eifach, wenn noch und noch immer meh Emotione ins Spiel kömme und au nachem Pfiff vom Schiri ufs Goal oder sogar uf Spieler gschosse wird. Nach dere Situation isch s Goal kurzzytig emne Qualitätstescht unterzoge worde. Ich ka euch sage, d Goal z Luzärn sin zimlig zimlig stabil, gueti Qualität. Genau so solid hämmer witergspielt und im dritte Viertel hämmer denn au s 0:4 gschosse. Scho wieder de Gaël, was e Maschine! Bi däm Resultat isches denn au bis zum Ändi blibe. E sehr e solidi und befridigendi Teamleischtig und definitiv e Reaktion ufs letschte Wuchenänd.

Jetzt muessi no bitz Platz fülle und die Franzose verstön das jo sowieso nid. Ich hoff Ihr hännd au alli e super Samstig ka und kömmet uns morn go unterstütze.

Nachere guete Duschi in de Sauna gots wieder zrugg nach Gänf wo morn s Dearby gege Black Boys ahstoht (villicht sötte mr lieber wieder mit 13 Spieler spiele?). E Mögligkeit das Wuchenänd no besser z mache. Salli zämme.

Valentin Gloor

Photo : archives, juin 2021